༄༅།།བློ་སྦྱོང་ཚིགས་བརྒྱད་མ་རྩ་འགྲེལ་བཞུགས་སོ། །

image_pdfimage_print

བདག་ནི་སེམས་ཅན་ཐམས་ཅད་ལ། །ཡིད་བཞིན་ནོར་བུ་ལས་ལྷག་པའི།  

དོན་མཆོག་སྒྲུབ་པའི་བསམ་པ་ཡིས། །རྟག་ཏུ་གཅེས་པར་འཛིནཔར་ཤོག

གང་དུ་སུ་དང་འགྲོགས་པའི་ཚེ། །བདག་ཉིད་ཀུན་ལས་དམན་བལྟ་ཞིང༌།

གཞན་ལ་བསམ་པ་ཐག་པ་ཡིས། །མཆོག་ཏུ་གཅེས་པར་འཛིན་པར་ཤོག

སྤྱོད་ལམ་ཀུན་ཏུ་རང་རྒྱུད་ལ། །རྟོག་ཅིང་ཉོན་མོངས་སྐྱེས་མ་ཐག

བདག་གཞན་མ་རུངས་བྱེད་པས་ན། །བཙན་ཐབས་གདོང་ནས་བཟློག་པར་ཤོག

རང་བཞིན་ངན་པའི་སེམས་ཅན་དང༌། །སྡིག་སྡུག་དྲག་པོས་ནོན་མཐོང་ཚེ།

རིན་ཆེན་གཏེར་དང་འཕྲད་པ་ལྟར། །རྙེད་པར་དཀའ་བས་གཅེས་འཛིན་ཤོག

བདག་ལ་གཞན་གྱིས་ཕྲག་དོག་གིས། །གཤེ་སྐུར་ལ་སོགས་མི་རིགས་པའི།

གྱོང་ཁ་རང་གིས་ལེན་པ་དང༌། །རྒྱལ་ཁ་གཞན་ལ་འབུལ་བར་ཤོག

གང་ལ་བདག་གིས་ཕན་བཏགས་པའི། །རེ་བ་ཆེ་བ་གང་ཞིག་གིས།

ཤིན་ཏུ་མི་རིགས་གནོད་བྱས་ནའང༌། །བཤེས་གཉེན་དམ་པར་བལྟ་བར་ཤོག

མདོར་ན་དངོས་སམ་བརྒྱུད་པ་ཡི། །ཕན་བདེ་མ་རྣམས་ཀུན་ལ་འབུལ།

མ་ཡི་གནོད་དང་སྡུག་བསྔལ་ཀུན། །གསང་བས་བདག་ལ་ལེན་པར་ཤོག

དེ་དག་ཀུན་ཀྱང་ཆོས་བརྒྱད་ཀྱི། །རྟོག་པའི་དྲི་མས་མ་སྦགས་ཤིང༌།

ཆོས་རྣམས་སྒྱུ་མར་ཤེས་པའི་བློས། །ཞེན་མེད་འཆིང་བ་ལས་གྲོལ་ཤོག

རྒན་ལམ་རིམ་ངག་དབང་ཕུན་ཚོགས་ལགས་ཀྱིས་གནང་བའི་བློ་སྦྱོང་ཚིགས་བརྒྱད་མའི་མཆན་འགྲེལ་བཞུགས་སོ།

ན་མོ་གུ་རུ།བླ་མ་སྤྱན་རས་གཟིགས་དབང་གི །ཞབས་ཀྱི་པད་མོར་གུས་བཏུད་ནས།

ཐེག་ཆེན་བློ་སྦྱོང་ཚིག་བརྒྱད་མའི།  །འབྲུ་འབྲེལ་ཙམ་ཞིག་འབྲི་བར་བྱ། 

      དེ་ལ་ཚིགས་བཅད་དང་པོའི་དོན་ནི། མི་གཞན་དག་ཇི་ལྟར་ཡང་གླང་ཐང་པ་བདག་གིས་ནི་ཡུལ་སེམས་ཅན་ཐམས་ཅད་ལ་བརྟེན་ནས་ཡིད་བཞིན་གྱི་ནོར་བུ་ལས་ཀྱང་ཆེས་ལྷག་པའི་དོན་མཆོག་བསྒྲུབ་པར་བྱ་སྙམ་པའི་བསམ་པ་ཡིས་ཀུན་ནས་བསླངས་ཏེ་མ་རྒན་སེམས་ཅན་འདི་ཐམས་ཅད་རྟག་ཏུ་གཅེས་པར་འཛིན་པར་ཤོག།དེ་ལ་དོན་མཆོག་ནི་སངས་རྒྱས་ཀྱི་གོ་འཕང་ཡིན་ལ། དེ་སེམས་ཅན་ལ་བརྟེན་ནས་བསྒྲུབ་ཏུ་ཡོད་པས་ན། སེམས་ཅན་ནི་ཡིད་བཞིན་གྱི་ནོར་བུ་ལས་ཀྱང་ཆེས་ལྷག་པ་ཡིན་ནོ།  

      ཚིགས་བཅད་གཉིས་པའི་དོན་ནི། གནས་གང་དུ་གྲོགས་སུ་དང་འགྲོགས་པའི་ཚེ་ཡང་བདག་ཉིད་ནི་འགྲོགས་ཡུལ་ཀུན་ལས་དམན་པར་བལྟ་ཞིང༌། གཞན་དག་ལ་ནི་ཁ་ཙམ་མིན་པར་བསམ་པ་ཐག་པ་ཡིས་རང་ལས་མཆོག་ཏུ་བལྟས་ཏེ་གཅེས་པར་འཛིན་པར་ཤོག།མདོར་ན་རང་ལས་དམན་པ་ནི་སུ་ཡང་མེད་སྙམ་དུ་ང་རྒྱལ་དང་ཁེངས་པ་སྐྱུངས་ཏེ་འགྲོ་ཀུན་སྤྱི་བོར་འཁུར་དགོས་པའི་དོན་ནོ།   

      ཚིགས་བཅད་གསུམ་པའི་དོན་ནི། འགྲེང་འཆག་ཉལ་འདུག་གི་སྤྱོད་ལམ་ཀུན་ཏུ་རང་རྒྱུད་ལ་དྲན་ཤེས་ཀྱིས་རྟོག་པར་བྱེད་ཅིང༌། བརྟགས་པ་ན་ཉོན་མོངས་སྐྱེས་ནས་འདུག་ན་དེ་མ་ཐག་འདིས་བདག་གཞན་མ་རུངས་པར་བྱེད་ངེས་པས་ན་རང་སོར་བཞག་ག་ལ་རུང་སྙམ་དུ་བཙན་ཐབས་སུ་གདོང་ནས་བཟློག་པར་ཤོག དོན་བསྡུས་ན། ཉོན་མོངས་སྐྱེས་མ་ཐག་རིག་པར་བྱས་ནས་འབུར་འཇོམས་བྱ་དགོས་པའི་དོན་ནོ།

      ཚིགས་བཅད་བཞི་པའི་དོན་ནི། ཡུལ་དུས་གང་ནའང་རུང་སྟེ་རང་བཞིན་ཤིན་ཏུ་ངན་པའི་སེམས་ཅན་དག་དང༌། དེ་བཞིན་དུ་ཧ་ཅང་ཚབས་ཆེ་བའི་སྡིག་པའི་ལས་ལ་ཞུགས་པ་དང༌། སྡུག་བསྔལ་ཤུགས་དྲག་པོས་ཀུན་ནས་ནོན་པའི་སེམས་ཅན་རྣམས་མཐོང་ཚེ་སྒྱིད་མི་ལུག་པར་དབུལ་པོས་རིན་ཆེན་གཏེར་དང་འཕྲད་པ་ལྟར། སེམས་ཅན་འདི་ལྟ་བུ་ནི་བྱང་ཆུབ་སྒྲུབ་པའི་ཡན་ལག་རྙེད་པར་དཀའ་བས་སོ་སྙམ་དུ་ལྷག་པར་ཡང་གཅེས་པར་འཛིན་པར་ཤོག 

      ཚིགས་བཅད་ལྔ་པའི་དོན་ནི། བདག་ལ་མི་གཞན་གྱིས་ཕྲག་དོག་གིས་ཀུན་ནས་བསླངས་ཏེ་གཤེ་ཞིང་མཚང་འདྲུ་བ་དང་བསྡིགས་ཤིང་སྐུར་ལ་སོགས་ཏེ་ཤིན་ཏུ་མི་རིགས་པའི་གནོད་པ་ཆེན་པོ་ཇི་འདྲ་ཞིག་བྱེད་ནའང་ཅུང་ཟད་ཀྱང་མི་ཁྲོ་བར་གྱོང་དང་ཕམ་ཁ་ཐམས་ཅད་རང་གིས་ལེན་པ་དང༌། ཁེ་དང་རྒྱལ་ཁ་ཐམས་ཅད་གཞན་ལ་འབུལ་ནུས་པར་ཤོག།མདོར་ན་རྒྱལ་ཕམ་རྩོད་པ་ན་ཕམ་ཁ་རང་གིས་ལེན་ཅིང༌། རྒྱལ་ཁ་གཞན་ལ་སྟེར་དགོས་པའི་དོན་ནོ།

      ཚིགས་བཅད་དྲུག་པའི་དོན་ནི། མི་གང་ལ་བདག་གིས་ཕར་ཕན་ཆེན་པོ་བདགས་པའི་ལན་དུ་ཚུར་ཡང་ཕན་འདོགས་པའི་རེ་བ་ཆེར་བྱེད་པ་འགའ་ཞིག་གིས་ཕན་ཐོགས་རྒྱུ་ལྟ་ཞོག་གི་དེ་ལས་ལྡོག་སྟེ་ཤིན་ཏུ་མི་རིགས་པའི་གནོད་པ་ཆེན་པོ་བྱེད་ནའང་ཁྲོར་མི་འཇུག་པར་བཟོད་པ་ལ་བསྐུལ་བའི་བཤེས་གཉེན་དམ་པར་བལྟ་བར་ཤོག།དོན་འདི་ལ་འཆད་ཁ་བ་ཆེན་པོས། ཕན་འདོགས་ལན་དུ་གནོད་བྱུང་ན། ཡང་ལན་སྙིང་རྗེ་ཆེན་པོ་བསྒོམ།  །ཞེས་དང༌། རྒྱལ་སྲས་རིན་པོ་ཆེས། བདག་གིས་བུ་བཞིན་གཅེས་པར་བསྐྱངས་པའི་མིས། །བདག་ལ་དགྲ་བཞིན་ལྟ་བར་བྱེད་ན་ཡང༌།  །བྱམས་པའི་དབང་གིས་སླར་ཡང་དེ་ཉིད་ཀྱི། །ཡོན་ཏན་བརྗོད་པ་རྒྱལ་སྲས་ལག་ལེན་ཡིན། །ཞེས་སོ།

      ཚིགས་བཅད་བདུན་པའི་དོན་ནི། གོང་དུ་ཇི་སྐད་བཤད་པ་རྣམས་མདོར་བསྡུས་ན། དངོས་སམ་སྟེ་ད་ལྟ་རང་ལ་ཡོད་པའམ་དེ་མེད་ཀྱང་བརྒྱུད་པ་ཡི་སྒོ་ནས་འབྱུང་བར་འགྱུར་བའི་ཕན་བདེ་མ་ལུས་པ་མ་རྣམས་ཀུན་ལ་ཕར་འབུལ་ཞིང༌། མ་ཡི་སྟེ་མ་རྒན་རྣམས་ཀྱི་རྒྱུད་ལ་ཡོད་པའི་རྒྱུ་གནོད་པདང་འབྲས་བུ་སྡུག་བསྔལ་ཀུན་གསང་བས་ཏེ་མངོན་ཆུང་གི་སྒོ་ནས་བདག་ལ་ཚུར་ལེན་ནུས་པར་ཤོག 

      ཚིགས་བཅད་བརྒྱད་པའི་དོན་ནི། གོང་དུ་བཤད་པའི་ལག་ལེན་དེ་དག་ཀུན་ཀྱང་འཇིག་རྟེན་ཆོས་བརྒྱད་ཀྱི་རྟོག་པའི་དྲི་མས་མ་སྦགས་ཤིང་ཕྱི་ནང་གི་ཆོས་རྣམས་ཀུན་བརྫུན་པ་སྒྱུ་མ་ལྟ་བུར་ཤེས་པ་བློས་གང་ལའང་བདེན་པར་ཞེན་པ་མེད་ཅིང་མཚན་མར་འཛིན་པའི་འཆིང་བ་ལས་གྲོལ་ཤོག།ཅེས་པའོ།

Leave a Reply

Be the First to Comment!

Notify of
avatar
wpDiscuz